Roger Serrano: “Ikuskizun apur bat ematen saiatuko naiz”

Australiatik itzuli berria da. Duela gutxi hartu zuen lur. Bertan bizitako esperientziekin lerro berriak idatzi ahal izan ditu bere egunerokoan. Laster irakurri ahal izango dugu ordukoari buruzko zerbait www.rogerserrano.com, bere webgunean. Iaz hartu zuen parte lehen aldiz BH Zarauzko Triatloian. Ordukoan, baina, igerian egin ez izanaren arantza geratu zitzaion barruan. Roger Serrano ikuskizuna eta gerra ematera itzuliko da Zarautzera.

Marmokak urrun egon daitezela nahi du bere bigarren parte hartze honetan. Barruan duen arantza atera nahi du. Iaz lortutako zortzigarren postuaren ondoren, ikusi beharko da nola moldatzen den Zarauzko frogan. Bera ezagututa, ordea, sorpresaren bat ematen ahaleginduko da ziur. Datorren ekainaren 14an zeresana emango du.

Read full storyIruzkinak ezgaituta

Bi ahizpa baino gehiago, bi triatleta baino gehiago

Bi aldiz hartu du parte eta bietan laugarren sailkatu da. Bi urte eta gero, Zarauzko kaleetan zehar ikusiko dugu. Esperientzia gehiagorekin dator, motibazio gehiagorekin, BH Zarauzko Triatloiari aurre egiteko prestaketa hobearekin. Ez dator bakarrik. Edizio berri honetan bere ahizparen konpainia izango du Saleta Castro Nogueirak. Distantzia erdian parte hartu nahi zuen eta Saletak Zarautzen estreinaldia egitea proposatu zion. Erabaki horren zergatiaz galdetuta, hauxe da beraien erantzuna: “Espainiako triatloiaren berezko lekua da Zarautz”.

Ahizpak izateaz gain, lagunak dira, lagun minak eta bata bestearen euskarri. Datorren ekainaren 14an Zarautzen parte hartuko dute. Hilabete eskas falta denean, honako elkarrizketa honetan aritu dira zintzo eta ilusio askorekin.

……………………………

Saleta Castro: “Ondo edo gaizki, helmugara iristea da saririk handiena”


-Hirugarren parte hartzea BH Zarauzko Triatloian. Zertan ezberdintzen da aurtengoa?

Hobeto ezagutzen dut zirkuitua. Aurten gainera, Espainian gehien gustatzen zaidan triatloia nire ahizparekin konpartitzeko ilusioarekin nator.

-Zein helbururekin zatoz Zarautzera?

Lanzaroteko Ironmanak gehiegi ez eragitea espero dut, 2012an gertatu zitzaidan bezala. Aurreko bi aldietako laugarren postua hobetzea gustatuko litzaidake.

-Duela gutxi distantzia luzean zentratu zara. Prestakuntza horrek Zarauzko frogarako balioko dizula uste al duzu?

Ironman bat egin eta gero, distantzia erdiko frogak motz gelditzen dira, baina hain zuzen ere horregatik, intentsitatea handiagoa da eta froga benetan gogorra egiten da. Badakit zerk itxaroten didan: guztia eman eta giroaz gozatu.

-Zerk erakarri zaitu distantzia luzetik?

Distantzia luzea gustatzen zait, batez ere norberak bere buruaren aurka borrokatzen duelako. Alderdi psikologikoa ezinbestekoa da. Lasterketa bakoitzak aurrekoa gainditzera zarama, eta horrek bultzatzen zaitu gehiago ematera. Ondo edo gaizki, helmugara iristea da saririk handiena.

-Zure webgunean Sergenten esaldi bat jasotzen duzu. Berak dio arrakasta ez dela lortzen ezaugarri bereziekin. Jarraipena, metodologia eta antolakuntzan oinarritutako lanaren emaitza dela. Baina norberak dituen ezaugarriek ere lagunduko dute, ezta?

Norbere ezaugarriak garrantzitsuak dira, baina askoz ere beharrezkoagoak dira berak aipatzen dituen jarraitasuna, iraunkortasuna eta pazientzia. Batek izan ditzakeen ezaugarriez haratago, ez da inora helduko aurreko guztia gabe. Aldiz, ezaugarri gutxi eta aurreko guztiarekin asko lortu daiteke.

-2014ko denboraldi honetan zure helburu nagusia Hawaiiko Ironmanean parte hartzea zen. Zer esan nahiko luke bertan izateak?

Munduko 35 triatleta onenen artean lehiatzea amets bat betetzea izango litzateke. Aurten zertxobait zaildu zait hara sailkatzea, eta dagoneko ez naiz horretarako borrokan ari. Urtearen amaieran hasiko naiz berriz ere puntuak pilatzen, eta horrela sailkatzea lortzen dudan arte.

-Eta zer esan nahi du zuretzat BH Zarauzko Triatloian parte hartzea?

2001ean triatloian hasi nintzenetik entzun izan nuen Zarauzko triatloiari buruz. Espainiako triatloiaren berezko lekua da. Ez zara benetako triatleta bat izango Lanzaroteko Ironmana eta Zarauzko distantzia erdia egiten dituzun arte. Uste dut honekin argi uzten dudala benetan froga berezia dela niretzat.

-Aurten ez zatoz bakarrik. Parte hartzaileen artean izango duzu Nerea, zure ahizpa. Distantzia erdian estreinatuko da, gainera. Zein aholku eman dizkiozu?

Berak badaki pixkanaka pixkanaka, disfrutatuz eta estutasunik gabe (froga oso luzea izango da beretzat) primeran egingo duela. Distantzia olinpikoaz eta esprintaz ahazteko esan diot, distantzia erdia norbere buruaren kontrako borroka dela.

-Denboraldi honi begira, nola ikusten duzu Nerea?

Iaz baino gehiago ari da lehiatzen aurten. Motibazio gehiagorekin dago. Bere kategorian Espainiako Duatloi Txapelketa irabaztetik dator. Zarauzko triatloiaren ondoren, distantzia erdiko froga gehiagotara animatzea espero dut.

-Zergatik aukeratu du Zarauzko froga estreinaldi horretarako?

Berak distantzia erdiko froga bat egin nahi zuela esan zidan. Halako zerbait esaten didanean azkar mugitu behar dut eta erabaki bat hartu iritziz aldatu ez dezan (berari baino ilusio gehiago egiten dit niri). Ez nuen zalantzarik izan. Hala esan nion, ‘primeran, Zarautzera goaz’. Niretzat ezin ederragoa izango da. Zarautzera itzuli nahi nuen eta berarekin askoz hobea izango da. Asteburu guztian zehar egoten den giroa izugarria da eta berak hori bizi dezan nahi dut. Horregatik aukeratu nuen Zarautz.

……………………………

Nerea Castro: “Lasterketan zehar Zarautzez gozatzea pentsatzen dut”


-Presio asko sentitzen al duzu zure ahizpa estatuko triatletarik onenetakoa dela pentsatzeak?

Ez, egia esan asko laguntzen dit egunean zehar motibatzeko eta ez dit batere inporta Saletaren ahizpa naizelako ezagutzea. Harro nago beraz, eta niretzat eredu bat da. Ez dago bera bezalako triatletarik.

-Nola izan dira zure hastapenak triatloiaren munduan?

Atletismoaren mundutik nator, ibilketatik hain zuzen ere. Pontevedrako Goi Errendimenduko Zentroan entrenatzen nuen eta gainerako kirolariekin konpartitzen nituen hango instalakuntzak. Han ezagutu nuen Omar (bere entrenatzailea) eta Saletaren laguntzarekin duatloi bat egiteko konbentzitu ninduten. Hurrengo urtean ibilketa utzi nuen triatloiagatik.

-Distantzia erdian estreinatzera zatoz. Zergatik aukeratu duzu Zarautz debut horretarako?

Zarautz aukeratu nuen distantzia hau erabili zuen aurrenetarikoa izan zelako. Oso ongi hitz egin zidaten beraz. Herriko jendeak dena ematen du. Parajeez ere hitz egin zidaten, baina oraindik ez dut ikusi argazki bat bera ere. Lasterketan zehar guztiaz disfrutatzea pentsatzen dut.

-Zer kontatu dizute BH Zarauzko Triatloiaz?

Bizikleta zatia oso gogorra dela esan didate. Maldaren batek beldurtzen nau… Korronteen eraginez, igeriketa zatia luze egiten dela ere esan didate. Eta lasterketa guztian zehar izaten den ikusminaz hitz egin didate, batez ere korrikako zatian. Ez dauzkazun lekutik indarrak ateratzen direla esan didate. Ikusiko dugu.

-Etorkizunean distantzia luzera saltoa ematea pentsatu al duzu?

Oraingoz ez nago prest, ez fisikoki, ezta psikologikoki ere. Esprintarekin alderatuz, luze eta gogorra egingo zait distantzia erdia. Lortzen dudan emaitzaren arabera hartuko dut erabakia.

-Azkenik, nola ikusten duzu Saleta denboraldi honi begira?

Saleta gaizki ikustea zaila da. Fisikoki gaizki badago ere, bere burua sekulakoa da. Urtetik urtero hobeto ikusten dut, diziplina bakoitzeko aspektuak hobetzen ditu… Laster batean Hawaiin ikustea espero dut.

Read full storyIruzkinak ezgaituta

Bi urtetarako akordioa sinatu dute Inversek eta BH Zarauzko Triatloiak

Bi urtetarako akordioa sinatu zuten pasa den apirilaren 24ean BH Zarauzko Triatloiak eta Inversek. Kataluniako enpresak bi urtez Zarauzko froga babesteko konpromisoa agertu du.

Espainia mailan egun dagoen enpresarik garrantzitsuenetariko bat da Inverse. Triatloiko arropa teknikoa fabrikatzen espezialistak dira. Joan Sabaté, bertako salmenten zuzendariaren arabera, “Inverserentzat ohorea da froga hau babestea; bertako eta atzerriko triatleten artean prestigio handia duen froga da”. Erropa etxeak babestutako triatletarik onenak ere irteera puntuan izango dira ekainaren 14an.

Ezaguera hori azaltzen duen datu argia da, urtea joan eta etorri 650 dortsalak denbora gutxian saltzen direla.

Zarauzko frogaren antolakuntzak ere akordio honen garrantzia azpimarratu nahi izan du. Aurtengo edizioko finisherraren elastikoa enpresa kataluniarrarena izango da, baita bolondresek jantzita eramango dutena ere. Urte guzti hauetan erakutsi duten esperientziaren arabera ziur gaude kalitaterik onenekoa izango dela. Ekainaren 13an eta 14an Munoa plazan egingo den EXPO-an Inverseren produktuak eskuratzeko aukera izango da.

Read full storyIruzkinak ezgaituta

Bizikleta eta korrika zatietan egindako berrikuntza nabarmenekin dator 2014ko BH Zarauzko Triatloia

• BH Zarauzko Triatloiaren XXVIII. aldia ospatuko da datorren ekainaren 14an. Izen-emate prozesua itxita dago iragan den otsailetik.

• Azken bi urteetako irabazle izan diren Catriona Morrisonek eta Maider Gaztañagak baieztatu dute euren parte hartzea. Baita Saleta Castro, Aimar Agirresarobe, Fraser Cartmell, Pedro Miguel Reig eta Peru Alfarok ere.

• Aurtengo edizioan begirada guztiak itsasoan jarrita egongo dira; Getaria – Zarautz zeharkaldia itzuliko da, eta bizikleta eta korrika zatietako zirkuituak aldatu dira.

Datorren ekainaren 14an jokatuko da BH Zarauzko Triatloiaren hogeita zortzigarren aldia. Gaur bertan aurkeztu da froga Donostian ireki berri den BH Concept Store dendan. Bertan izan dira besteak beste, Asier Sarriegi Gipuzkoako Foru Aldundiko Kirol Zuzendaria, Inaxio Alguacil, Zarauzko Triatloi Elkarteko presidentea eta Ivan Sarralde, BHko Marketing arduraduna. Beste urte betez 650 triatletek izango dira irteera puntuan. Euren artean kirol honetan aritzen diren profesional handiak ikusteko aukera zabala egongo da: Aimar Agirresarobe, Fraser Cartmell, Pedro Miguel Reig eta Peru Alfaro gizonezkoen mailan, eta Catriona Morrison, Maider Gaztañaga eta Saleta Castro emakumezkoen mailan.

Kantabrikoko berezko triatloiak aldaketa nabarmenak egin ditu bizikleta eta korrika zatietan. Zarautz inguruko naturaren edertasuna agerian utzi nahi izan du horrela antolakuntzak. Ibilbide berria Zarauzko froga egutegiko triatloirik erakargarriena den modura aukeratzen duten kirolarientzat diseinatuta dago.

Getaria-Zarautz zeharkaldia berriro

Iaz, froga hasteko ordu gutxi falta zirela, igeriketa zatia bertan behera utzi behar izan zuen antolakuntzak, berez triatloia zena duatloian bihurtuz. Marmoken izurrite batek eragin zuen orduko hartan ibilbide aldaketa. Horregatik aurtengo begirada guztiak itsasoan jarrita egongo dira; badator Getaria-Zarautz zeharkaldia.

Getariako hondartza izango da ba hasiera puntua, berriz ere. 14:00etan emango zaio hasiera emakumezkoen lasterketari, eta ordu laurden beranduago, 14:15ean, gizonezkoenari.

Igeriketa zatiaz gain, bizikleta eta korrika zatiak ere nabarmen aldatu dira joan den ediziotik. Froga jokatzeko aste gutxi falta zirela Zumaia eta Getaria arteko errepidean zulo bat agertu zen, eta horren ondorioz, aurreikusita zegoen ibilbidea aldatu beharra egon zen. Antolakuntzak ordurako prestatuta zegoen ibilbidearen aldeko apustua egin du aurten berriz ere.

Ibilbideak bi zati izango ditu. Lehen zatian 28 kilometroko bi itzuli egin beharko dira. Zarauztik Meagas igo beharko da, ondoren berriz kostaldetik itzultzeko. Lehen bi itzuli hauetan Meagas gaina igo beharko da. Ez du malda gogorrik (%3.5eko batazbestekoa), baina kontuan hartu beharrekoa da duen luzera.

82 kilometroko ibilbide guztia osatzeko 25 kilometroko luzera duen beste itzuli bat egin beharko da. Bigarren zati hau Zarauztik Oriora bidean abiatuko da. Hortik Aiako pareta famatua igo eta Oriora jaitsi beharko da berriz. Oriotik boxeetarako bidean Txurrukako gaina igo beharko da.

Korrikako zatia ere aldatu da aurreko edizioetako ibilbidearekin alderatuz. Hiri barruan kilometro gehiago egin beharko dira, zaleen babesa gertuagotik jasoz.

Triatleta profesionalen presentzia

Catriona Morrison, 2011 eta 2013 urteetako irabazlea bere hirugarren txapelaren bila dator Zarautzera. Bera izango da emakumezkoen frogari nazioarteko ukitua emango diona. Garaipenaren borrokan izango dira Maider Gaztañaga eta Saleta Castro ere. 2012ko garaileak bere kirol ibilbideko azken urtea du honakoa eta orduko garaipena errepikatu nahian etorriko da. Galiziarrak, aldiz, Hawaieko Ironmana du helburu. Hari begira, inflexio puntu garrantzitsu gisa markatu du BH Zarauzko Triatloia.

Gizonezkoen mailan Aimar Agirresarobe, iaz Eneko Llanosen atzetik sailkatu zen tolosarra aurkitzen da faboritoen artean. Bilbon irabazita etorri zen orduko hartan Zarautzera, eta froga dotorea osatu zuen euripean. Berekin lehian ariko dira Fraser Cartmell eskoziarra. Lehen aldiz izango da Zarautzen, baina distantzia luzean esperientziarik falta ez duen atleta da bera. Peru Alfaro, Zarauzko froga benetan ondo ezagutzen duen atleta ere bertan izango da. Azkenik Pedro Miguel Reigek ere bere presentzia ziurtatu du dagoeneko.

Izen-ematea egun gutxitan itxita

Beste behin ere parte hartzaileen erantzuna ezin hobea izan da. Ohiko prozedura aldatuta ere, egun gutxiren buruan amaitu ziren 650 plazak.

Antolakuntzak iaz irteera hartu zuten triatleten saiakera saritu nahi izan zuen izen-emate prozesuan lehentasuna emanda. Libre gelditu ziren plazak otsailaren 3an jarri ziren salgai, eta bi egunetan amaitu ziren.

ETBk zuzenean emango du froga

Bigarren urtez jarraian Euskal Telebistak zuzenean emango du froga. Munoa plazan jarriko den pantaila erraldoian ere jarraitu ahalko dute froga Zarautzera gerturatzen diren jarraitzaile guztiek. Bertan egongo da EXPO-a. Diziplina honetan produkturik onenak eskaintzen dituzten markarik onenak bertan izango dira

Read full storyIruzkinak ezgaituta

Badatoz berriz KEDADAK

BH Zarauzko Triatloiko antolakuntzak kedaden aldeko apustua egin du beste behin ere. Parte hartzaile guztiei elkarrekin entrenatzeko aukera eman nahi die modu horretara. Aurreko edizioetan izandako arrakastaren ondotik dator hirugarren edizio hau. Antolakuntza Batzordeak ibilbidean zehar dauden lekurik esanguratsuenak erakustea du helburu.

Datorren apirilaren 19an eta 20an egingo dira hiru kedadak, eta parte hartzen duten guztiek lekurik teknikoenei eta zailenei buruzko aholkurik onenak jasoko dituzte. Zirkuituak ezin hobeto ezagutzen dituzten lagunek gidatuko dituzte kedadak.
Apirilaren 19an bi kedada egingo dira. RUN kedada egiteko interesa duten guztiak goizeko 10etan elkartuko dira Hiru Bat triatloi dendan. Herriko Musika Plazan dago denda. Frogako babesle ofizial gisa, parte hartzen dutenek ZOOT enpresaren zapatilak probatzeko aukera izango dute ibilbide guztian zehar.

Egun berdinean, arratsaldeko 16retan SWIN kedada egingo da. Ordu horretarako Getariako hondartzan egon beharko da. Goizean bezala, hor ere ZOOT enpresaren neoprenoak probatzeko aukera egongo da. Hasiera batean asmoa Getariatik Zarautzera bitarteko zeharbidea egitea da, baina itsasoaren baldintzek hala uzten ez badute, Getariako badiaren barruan egingo da entrenamendua.

Hilaren 20an amaituko dira kedadak. Goizeko 9:30ean Hiru Bat triatloi dendara gerturatu beharko dute interesatu guztiek BIKE kedadan parte hartzeko. Hiru entrenamenduen ostean sorpresak izango dira guztientzat.

Parte hartzeko interesa duten horiek mezu bat bidali beharko dute apirilaren 18a baino lehen info@zarauzkotriatloia.com helbidera. Beste urtebetez kedadek aukerarik onena eskainiko dute datorren ekainaren 14an egin beharko diren zirkuituetan zehar entrenatzeko.

Animatu parte hartzera!!

Read full storyIruzkinak ezgaituta

ZOOT, BH Zarauzko Triatloia 2014rako neoprenorik onena

Bizikleta eta oinetakoak trantsizio gunean utzi, eta autobusera. Zarauzko Triatloiak berezkoa du xarma. Hasieratik amaieraraino. Izan ere, froga ez da igeriketa zatiarekin hasten. Autobuseko bidaiarekin hasten da. Getarian.

Goizean goiz esnatu, nerbioak kontrolatu ezin, gosaldu, material guztia prestatu, hiru ibilbideak buruan irudikatu, bazkaldu, materiala boxetan prest utzi. Eta neoprenoa jantzita autobusera. Urteroko errituala dirudi.

Aurten lehen aldiz, triatloian marka liderra den ZOOT enpresak lagunduko zaituzte bidaia horretan. 30 urte baino gehiagoko esperientzia duen enpresa da, igerilari eta korrikalari guztientzat erreferentziazko marka.

Atleta guztien beharrak hasieratik amaieraraino asetzeko produkturik berritzaileenak merkaturatzen dituzte ZOOTen. Bere hasierako baloreei kasu eginez, produkturik osatuenak eta teknologikoki aurreratuenak eskaintzen dizkie bezeroei.

Horregatik guztiagatik BH Zarauzko Triatloiko igeriketa zati mitikoa berme guztiekin aurre egiteko babesa emango dizue ZOOT neoprenoak, Getariatik Zarautzeraino.

Read full storyIruzkinak ezgaituta

BH Zarauzko Triatloiko antolakuntza zuen osasunaz kezkatzen da oinetatik hasita

Zarauzko Zentro Podologikoa herriko erreferente nagusia da. Iaztik ari da BH Zarauzko Triatloia babesten eta proba aurrera ateratzen laguntzen, eta aurtengo edizioan ere hor izango da. Ekainaren 14an irteera hartuko duten 650 triatleten oinak inoiz baino babestuago egongo dira. Uretatik irten eta boxeetako gune guztia alfonbrez ustiatuko du Zentro Podologikoak.

Askotan ahazten gara oinen zaintzak duen garrantziaz. Ez diegu merezi duten arreta eskaintzen, eta hain zuzen ere horregatik, pentsamendua aldatu behar dugu. Oinen zaintza ezinbestekoa eta jarraia izan behar dela barneratu behar dugu urte guztian zehar.

BH Zarauzko Triatloirako garrantzitsua da zaintza horri berezko arreta eskaintzea. Lurrarekin etengabeko kontaktuan daude oinak eta ezinbestekoak dira helmugara ahalik eta egoerarik onenean iristeko. Aldizka errebisioak egitea gomendatzen da, gorputzeko gainerako parteetako minberak saihesteko. Zuen oinak esku onenetan egongo dira Zarautzen egun dagoen klinikarik onenean. Hala erakusten dute jendaurrean daramatzaten hamabost urteek.

Read full storyIruzkinak ezgaituta